前兩日去了布市嘅中國領事館。我眼見個個都攞住一疊疊表格嘅物體，我得自己一個，自己又蠢意大利文已經夠半桶水，西文更加唔洗恨，開始騰雞起來。打俾意佬打算向佢求救，話哂我都搭咗一個鐘巴士加行咗半個鐘，真係唔得就忽啦。點知未問完，後面有鼓老牛咁嘅聲喝過嚟仲要大大力拍打我膊頭” señora bla blabla bla...huh?!!!”
全場靜哂望住我，我樣衰得唔知喺邊揾個窿捐，原來領事館內唔俾用電話。以前喺香港無論去到邊，有咩場合唔準用電話都大大張通告貼到盲嘅都模到，咁佢又冇貼我又點會知唔得啫。最後擾攘咗3個鐘，終於收隊去買餸。
阿根廷超市的收銀姐姐會隨住佢哋嘅心情或係咪咁啱夠鐘收工而對排緊隊的客要求”兩行排成一行” 或”一行拆返開兩行”。我又會聽得明啦？唯有啲人去邊我咪跟住行，點知有個搽咗紫藍色眼影嘅湯婆婆又喝過嚟”no! Xxxx blabla xxxhuh!” 我蠢但未至於低能，估到咩事啦好話我打尖，但我想話我只係跟住前面個嬸嬸行啫。當下一刻，縱使我有口解釋，又會有人聽得明咩？
返到去啲餸越切個心越梗，覺得自己價值等於零。從前喺尖咀紅磡行走江湖嘅我，依家連買paul菜都俾人當大媽咁看待。呢個時候從耳蝸背後傳來一句” you’re not alone “。
都說女人的眼淚永遠都敵不過暖男的一句安慰，洋蔥、薯仔，全部都睇唔清了，所有積下嘅委屈同把刀一樣，通通都放低了。
即使遇到暴風雨，即使無人陪伴而孤獨，即使因爲沒走過的路而恐懼，我也會撐下來，一定會在你身邊。
冇嘢嘅聽朝起身又一條好漢，最多以後有咩收銀命令都自己欄到去最後排過，以後凡有食蕉的室內場所收埋部電話，以後好學好啲西文。
#我硬淨所以我存在
#youarenotalone
#湯婆婆好惡
Search